#SomosArquivo é o lema escollido polo Consello Internacional de Arquivos (ICA) para celebrar o día internacional dos arquivos, o 9 de xuño de 2022.  

Os e as profesionais estamos directamente interpelados este ano polo Consello Internacional dos Arquivos, para expresar que é ser Arquivo.  

E que é?  

• É coñecer as e os arquivistas que traballan nos nosos centros, cantos, onde, con que formación, en que postos. 
• É empoderar ás profesionais, debido a que sobre os seus ombros recae a xestión, a organización, a difusión, a conservación, a preservación da memoria.  
• É recoñecer o noso papel na construción consciente da memoria do noso pobo, tomando partido por uns arquivos de todas e para todas  
• É mostrar as mulleres ocultas entre os fondos, iluminar os seus perfís para que brillen como deben no concerto xeral.  
• É elaborar instrumentos que as visibilicen para que aqueles e aquelas que as buscan as atopen facilmente.  
• É mirar cara ás e aos desfavorecidos, para non excluílos irreflexivamente da memoria que debe perdurar.  
• É esixir ás institucións e ás organizacións outras miradas, outras accións, outras actividades, para incluír, para acoller, para non discriminar.  
• É, en resumo, camiñar conscientemente cara a unha memoria social e individual inclusiva, co impulso profesional de quen non podemos acomodarnos, pedíndolle a quen toman decisións sempre, un paso máis, un esforzo maior, unha acción mellor.  

#SomosArquivo #IAW2022