BAMAD Galicia ante os orzamentos da Xunta de Galicia para Arquivos 2022
Cando estamos a falar do “maior orzamento da historia de Galicia”, as partidas dedicadas a investimentos en arquivos no orzamento de cultura están conxeladas.
Só soben en pouco máis de 70.00€ o partida dedicada a Bolsas para conservación do Patrimonio documental en arquivos (4801) do capítulo IV.
Outro ano máis, non só non conseguimos recuperar os investimentos dedicados a estes centros anteriores á crise de 2008, senón que, nun contexto alcista dos orzamentos, os arquivos perden peso proporcionalmente no volume de gasto da Xunta de Galicia.
Con estas dotacións será difícil que 2022 sexa o ano do Plan de Arquivos da Xunta de Galicia previsto na Lei de arquivos e documentos de Galicia de 2014. Plan que xa leva 7 anos de demora. Como abordar a creación de arquivos como os Arquivos Xerais Territoriais da Coruña e Ourense, (locais, mobiliario, andeis etc.)? Como abordar axudas á contratación de arquivistas para os arquivos municipais dos concellos máis pequenos? Como implantar a perspectiva de xénero nos centros con estas dotacións?
Nun ano que debería ser de despegue e recuperación despois de máis de ano e medio de pandemia os arquivos terán que volver esperar tempos mellores para poder dar resposta ás necesidades de infraestruturas, de mobiliario ou de ferramentas de traballo.
Desde BAMAD Galicia entendemos que é preciso aumentar o esforzo orzamentario dedicado aos arquivos xa que levan sufrindo unha asfixia económica desde hai máis de 10 anos que afecta ao normal desenvolvemento das súas funcións; que non permite a creación dos arquivos que a propia Lei de arquivos e documentos prevé; e impide atender os novos retos con ferramentas, locais, medios e persoal suficiente. Galicia precisa duns arquivos propios do século XXI que dean servizo á sociedade cos medios necesarios para adaptarnos a un mundo en constante transformación.
A Xunta Directiva de Bamad Galicia
A Coruña, 28 de outubro de 2021
Cadro comparativo e gráficos de Arquivos 2019-2022
| 2022 | 2021 | 2020 | 2019 | |
| Bolsas para conservación do Patrimonio documental en arquivos (4801) | 114000 | 107406 | 107406 | 107406 |
| Maquinaria, instalacións e utensilios de arquivos. Adquisicións (6231) | 17200 | 17200 | 17200 | 17200 |
| Mobiliario e útiles de arquivos (6252) | 24000 | 24000 | 24000 | 24000 |
| Proxectos e informes e dirección en materia de arquivos (6283) | 200000 | 200000 | 135000 | 135000 |
| Adquisicións e restauración do patrimonio documental (6284) | 23336 | 23336 | 23336 | 23336 |
| Publicacións en materia de arquivos (6286) | 10000 | 10000 | 10000 | 10000 |
| Obras de conservación de arquivos (6321) | 50000 | 50000 | 35000 | 35000 |
| Actividades difusoras e de promoción de arquivos e patrimonio documental (6404) | 200000 | 200000 | 200000 | 161250 |
| Axudas a entes locais para investimentos en arquivos (7600) | 110000 | 110000 | 110000 | 100000 |
| Total | 748536 | 741942 | 661942 | 613192 |
Categorías:Arquivos, Noticias Bamad
BAMAD GALICIA 