PENSEMOS EN IGUALDADE, CONSTRUAMOS CON INTELIXENCIA, INNOVEMOS PARA O CAMBIO

O lema para o Día Internacional da Muller 2019, escollido pola ONU é “Pensemos en igualdade, construamos con intelixencia, innovemos para o cambio”.E desde esa institución explícannos que ese tema deberá centrarse en formas innovadoras nas que poidan avogar pola igualdade de xénero e o apoderamento das mulleres.

Desde BAMAD-Galicia sumámonos e facemos noso este lema porque sabemos que nos nosos ámbitos debemos traballar pola igualdade e innovar para cambiar contribuíndo a construír con intelixencia unha memoria social máis equitativa e máis xusta. Por iso desde a Asociación, reivindicamos neste día:

• Que o Plan de Arquivos, previsto na Lei de Arquivos de Galicia, que leva case 4 anos de demora, se realice con perspectiva de xénero e afecte a todos os procesos arquivísticos.

• Que o recente creado Observatorio de Igualdade de Xénero do Ministerio de Cultura inclúa no seu plan de traballo os arquivos.

• Que o Sistema de Arquivos de Defensa planifique o seu desenvolvemento con perspectiva de xénero; non esquecemos os arquivos deste sistema no noso país.

• Que se redacte un Plan de Bibliotecas Publicas e un Plan de Lectura Pública no que se teña en conta a perspectiva de xénero.

• A planificación das Bibliotecas especializadas tamén deberán realizarse con esta perspectiva.

• Os Museos de Galicia tampouco poden ser alleos á visibilización das mulleres polo que a perspectiva de xénero deberá ser un elemento básico de planificación.

• Desde as Insitucións da Memoria temos a obriga de visibilizar ante a sociedade e rescatar para a historia o papel, até agora oculto, das mulleres como suxeito participante das actividades humanas ao longo do tempo: traballadoras, autoras, creadoras, propietarias, empresarias, artistas, pensadoras…

Non podemos esquecer que todo isto farano posible o colectivo de profesionais de arquivos, bibliotecas e museos, colectivo moi feminizado e polo tanto con menor prestixio social e menores salarios. Por iso hoxe tamén é o día de seguir a demandar que as nosas condicións de traballo sexan máis xustas e equitativas, e así traballaremos:

• Para que as nosas profesións teñan o recoñecemento que merecen e que iso se reflicta en remuneracións xustas para todas

• Para que as arquivistas, as bibliotecarias e as museólogas teñan visibilidade defenderemos que a súa presenza sexa acorde á composición da nosa profesión en xornadas, seminarios, congresos, ciclos de conferencias, publicacións, etc.

• Para que non se contraten arquiveiras, bibliotecarias ou museólogas en categorías inferiores ás que lles corresponden.

• Para que os e as profesionais dos nosos sectores poidan conciliar o seu traballo coa súa vida persoal.

• Para que nas administracións as nosas retribucións sexan equivalentes a outros corpos e escalas.

Non debemos esquecer que existe unha lexislación que obriga ás administracións públicas a desenvolver políticas de igualdade e todas as administracións deberían participar na consecución destes obxectivos.

Configurar unha memoria conscientemente construída na que as mulleres teñan unha participación equitativa como protagonistas da historia e como traballadoras recoñecidas neste sector ten que ser unha finalidade prioritaria.

Desde Bamad Galicia facemos tamén un chamamento a participar nas actividades que con motivo do 8M están orientadas a visibilizar o papel das mulleres na sociedade.

Feliz día 8 de Marzo, día das Mulleres

Xunta directiva de Bamad Galicia