Comunicado de BAMAD Galicia ante os novos orzamentos da Xunta de Galicia para Arquivos 2017
O proxecto de Lei de orzamentos da Xunta de Galicia do ano 2017 conxela a partida dedicada a Arquivos. Desde o ano 2012 a redución foi dun 44%
Estas mínimas dotacións orzamentarias continúan asfixiando os centros e seguen a reducir as posibilidades de levar a cabo unhas políticas arquivísticas adecuadas á realidade do noso país.
Os centros dependentes e xestionados pola Xunta de Galicia carecen de infraestruturas para exercer as súas funcións, e de persoal suficiente, déficits, que con este orzamento, xa se fan crónicos.
A pesar da situación dos arquivos, tamén no ano 2017, máis da metade do orzamento para investimento corresponde a Actividades difusoras e de promoción de arquivos e patrimonio documental, e así todos os arquivos do sistema de Galicia contan con 0€ para maquinaria, 8.835€ para mobiliario (neste concepto inclúense os andeis), 23.000€ para obras ou 10.850€ para adquisición e restauración de patrimonio.
É este un orzamento adecuado as necesidades dos arquivos de Galicia? A resposta é obvia.
A lei de arquivos aprobada en 2014 tampouco parece que estea a remediar os problemas, en outubro do ano 2015 cumpriuse o prazo establecido para que a consellaría competente en materia de cultura lle propoña ao Consello da Xunta de Galicia a aprobación dun Plan de arquivos que avaliará as necesidades de persoal e de infraestruturas dos arquivos do Sistema de Arquivos da Xunta de Galicia, un ano despois do cumprimento do prazo, non coñecemos nada dese plan.
Nesta situación, os profesionais reclamamos da Xunta de Galicia un esforzo en materia de orzamentos para arquivos e que cese esta asfixia económica que segue a deteriorar os servizos de arquivos, imprescindibles para garantir dereitos e obrigas da cidadanía, para cumprir os compromisos da Xunta de Galicia en materia de transparencia, e para facilitar ao acceso da cidadanía ao patrimonio documental do noso país.
A Xunta Directiva de Bamad Galicia
A Coruña, 14 de Decembro de 2016
Cadro comparativo e gráficos dos últimos anos
|
Partidas |
2017 |
2016 |
2015 |
2014 |
2013 |
2012 |
| Bolsas para conservación do Patrimonio documental en arquivos (4801) | 107.406 | 107.406 | 107.406 | 107.406 | 107.406 | 111.762 |
| Maquinaria, instalacións e utensilios de arquivos. adquisicións (6231) | 0 | 4.972 | 14.972 | 14.972 | 14.972 | 24.000 |
| Mobiliario e útiles de arquivos (6252) | 8.835 | 8.835 | 8.835 | 8.835 | 8.835 | 25.000 |
| Proxectos e informes e dirección en materia de arquivos (6283) | 25.631 | 18.750 | 30.000 | 60.000 | 60.000 | 167.058 |
| Adquisicións e restauración do patrimonio documental (6284) | 10.850 | 10.850 | 75.000 | 75.000 | 75.000 | 122.285 |
| Movemento e traslados de fondos documentais (6285) | 0 | 0 | 2.100 | 2.100 | 2.100 | 3.907 |
| Publicacións en materia de arquivos (6286) | 4.186 | 6.095 | 14.095 | 14.095 | 14.095 | 23.000 |
| Obras de conservación de arquivos (6321) | 23.000 | 23.000 | 30.000 | 30.000 | 30.000 | 36.445 |
| Actividades difusoras e de promoción de arquivos e patrimonio documental (6404) | 141.250 | 141.250 | 50.000 | 50.000 | 50.000 | 60.000 |
| Total | 321.158 | 321.158 | 332.408 | 362.408 | 362.408 | 573.457 |
Orzamentos para Arquivos: evolución
Orzamentos para Arquivos: detalle e total
Categorías:Arquivos, Noticias Bamad
BAMAD GALICIA 