O 9 de xuño de cada ano celebramos o Día Internacional dos Arquivos. Os profesionais estamos de celebración.  É un día especial, organizamos actividades, recibimos máis visitantes, abrimos de par en par as portas e ventás  dos nosos centros.

Convidamos á cidadanía a nos coñecer, a facer dos arquivos un centro próximo,  que  nos  axuda, que  garante os nosos dereitos e as nosas obrigas e que preserva a nosa memoria.

Neste día especial queremos tamén convidar a visitarnos aos responsables das administración públicas para que nos coñezan de perto. Para que vexan como nestes últimos anos:

• se reduciu o persoal  e os orzamentos dos arquivos da Xunta de Galicia,
• os edificios desta administración están colapsados e non dispoñen de espazo para realizar a súas funcións,
• e en cidades como Vigo e Santiago segue sen existir prazas de profesionais dos arquivos. Que se podería dicir cando se trata de concellos máis pequenos…

Neste día especial  aquí estaremos a traballar, e mañá tamén.

Desde BAMAD Galicia celebramos e traballamos polo recoñecemento dos profesionais que nesta situación seguen traballar sen desmaio.

Na Coruña a 9 de Xuño de 2016

A Xunta Directiva de Bamad Galicia