Presentamos a Memoria anual de actividades de Anabad Galicia correspondente ao ano 2013. Dámos conta da situación actual en canto á estrutura organizativa, actividades realizadas e ao programa de formación levado a cabo.

O dato a destacar no ano 2013 é o crecemento en número de persoas asociadas, recuperándonos da tendencia á baixa dos últimos anos. Dato importante se temos en conta o contexto de crise no que nos encontramos.

As actividades e a repercusión social da Asocación continúa sendo alta. Nas redes sociais continúa a medrar a nosa presenza e visibilidade, con incremento no número de seguidores e lectores, e con seguimento continuado das noticias do noso sector profesional.

No que corresponde ás actividades de defensa da profesión, incidimos especialmente nas demandas ante a administración e participamos, mediante alegacións, na elaboración de normativas como o Decreto de constitución do Consello de Cooperación Bibliotecaria e a Lei de Arquivos.

As actividades formativas continúan a ter boa acollida contando cun importante número de alumnado e a novidade de realizar algunha actividade gratuíta para persoas asociadas. Aínda así, non todas as actividades tiveron a mesma repercusión e, temos que sinalar, o curso que se cancelou por falta de participantes suficientes. Tamén destacamos que continuamos a ofrecer actividades en colaboración con outras entidades, neste caso coa Fegamp.

Como resultado negativo temos que sinalar a imposibilidade de crear grupos de traballo estables e a pouca implicación das persoas asociadas na vida da Asociación. Malia isto, a finais de ano lanzouse un grupo de autoformación en oposicións bibliotecarias que agardamos teña boa acollida.

Podes consultar a Memoria premendo na imaxe: